Programm & Agenda

D’Fasnächtlerinna und Fasnächtler treffend sich in dr Khurer Rothushalla, wo dr Stapi – aktuell dr Meuli Hans Martin – dr Schlüssel zur Stadt an dr Präsident vur Fasnachtsvereinigung übergit. Ab jetzt ghört d’Bündner Hauptstadt da Narra. Für dia kommendi Fasnacht wettemer dä wichtigi Alass as biz ufwerta. Infos dazua gitz, wenns es si git.

Jetzt isch würkli Fasnacht. Zum Uuftakt trifft sich d’Fasnachtsgmeind ab 2027 nüm zur Uufwärmata sondern zum Khurer Knall ufem Martinsplatz. An noia Event, wo dia alti Tradition vum Iischüscha durch d’Cannoniers de Carneval ufleba loht und mitra einzigartiga Komponenta ergänzt. Luut, bunt, Fasnacht total. Das wird brutal guat, seit dr Patric.

Uuswärtigi Guggana sind imfall mega willkomma – will, je me desto besser! Am besta grad unna mitem Formular amelda.

https://churer-fasnacht.clubdesk.com/anmeldung

Dr gross Umzug isch siit über 50 Johr Zentrum und Herzstuck vur Fasnachtsziit in dr Bündner Hauptstadt. Jenschti Gugga und Kliggana verwandlend Khur in a Bühni und machend das mehrstündiga Spektakel zuma richtiga Volksfescht.

Und denn gohts ab uf d’Gass! In dr historischa Altstadt treffend sich Narra, Kostümiarti und Guggamusika zur legendära Strossafasnacht. Guggana vu do und au vu swo anderscht fiirend mit irem Sound dia 5. Johresziit – als freii Formationa odr uf da Bühna in dr Altstadt*. Und dia dekoriarta Bars sorgend für Abwechslig und mengmol auf biz Wärmi – will z’Trinka gebt’s dussa au. Bis tüüf in d’Nacht jedafalls khört denn d’Khurer Altstadt da Narra.

*Gern nehmemer oi ins freiwilliga Programm, wenn er oi unna ameldend.
(Freiwillig heisst denn nit, miar luagend mol ob mer kömmend. A fixa Termin ischs denn schu.)

Nochdem dia «Grossa» ira Spass kha hend, töffend au dia Kliinschta no mitfeschta. Öppa Zwai-Tuusig Kids und Teenies begeisterend am Kinderumzug d’Zuaschauerinna und Zuaschauer. Mit viel Froid, Charme und Fantasie sorgend dia klina Fasnächtlerinna und Fasnächtler für a einzigartigi Stimmig und machend dr Kinderumzug zuma bsundera Highlight.

Miar froiend üs über jedi Gugga, wo zemma mit üsna klina Fasnächtler laufa will – au wenns schu gross sind.

Am Mäntig nehmemer denn kai Blatt meh vors Muul – macht dr Bündner jo eh nit. Aber d’Schnitzelbänk vu da regionala Maischterformationa sind denn schu nomol a anderi Kategorie. Jedafalls wird in da Beiza gsunga, graimt und charmant uustailt. So guat, dass mer es mittlerwiila schu am Friitigobed a erschti Rundi Schnitzelbänk git.

Am Fasnachts-Ziischtig git’s au kurz vor Schluss kai halbi Sacha: Am letschta Obed vur Fasnacht werden nomol d’Khurer Gassa übernoh. Guggana, Fasnächtler und Beizer schiabend a närrischi Extraschicht bis zum bittera End am Mittwuchmorga. Es wird nomol gsunda, tanzt und gfeschtet.

Das isch jetzt noi. Miar treffend üs am 8i (20:00 Uhr) bir GKB/Restaurant Calanda und marschiarend denn zemma uffa zum Arcas-Platz, em Fasnachtszentrum. Natürli mit Zwüschastopp in dr Rothuushalla. Mit dabi sind Guggana, Kligga mit (belüchteta) Handwaga und as paar Gäscht.

Dr farbigi Abschluss vur 5. Johresziit isch denn, wenn sich dr harti Kern am Mittwuchmorga uf da Strossa mit dena vermischt, wo gad go schaffa gönd. Traditionell beendet a handvoll hartgsottni Fasnächtlerinna und Fasnächtler zemma mit em Vorstand vur Fasnachtsvereinigung dia Närrischi Ziit mitama kliina Umzug zrugg zur Rothushalla. Dött kriagt dr Stapi sin Schlüssel zrugg und miar gönd hai und ruabend üs us für nögscht Johr.