Es isch Fasnacht. Mit dr Übergaab vum Stadtschlüssel an d’Fasnachtsvereinigung Chur isch dia füüft Johresziit jetzt offiziell iglüütet. Bis zum Aschermittwuch khört d’Bündner Hauptstadt da Narra. Und dera gitz viel, wia sich gester obed widr zeigt het.
«11.11. am 17i11 – miar hend a biz meh Geduld bruucht als sus, aber jetzt gohts los. Jetzt gohts richtig los!», dr Meuli Hans Martin isch bi sinera Begrüassig richtig im Fasnachtfiaber. «In dem Umfeld wo mer hüt lebend, ischs wichtig, dass mer söttigi Traditiona wiiterbewahra tüand», heissts vum obersta Churer öppa no wiiter. Kriagt het dr Schlüssel zum ersta mol das Johr dr Sandro Durisch, dr noi Präsident vur Fasnachtsvereinigung Chur. Gstrahlet het dä.
Aber nit nu dr Stapi und dr Präsi hend froid kha, dass es endli losgoht. Trotz dr Verschiabig weg vur traditionella Uhrziit 11i11 zu 17i11 sind unglaublich vieli Erwachseni und Kind in d’Stadthalla kho zum d’Narraziit gebührend iizlüüta. Unter dr fachkundiga Beschallig vu da Schamaroper Poper hend d’FasnächtlerInna d’Roothuushalla für dia kommendi Saison voorgwärmt. «So cool, widr fasnacht!», het aswer aswo gsait. Recht het sie.